Фэст аўтэнтычных спеваў "Бабулі" ў в. Закальное Любанскага раёнаУ в. Закальное Любанскага раёна прайшоў фэст аўтэнтычных спеваў "Бабулі". Выступілі носьбіты мясцовага песеннага стылювыканання традыцыйных песень, аўтэнтычныя гурты “Журавушка“ (в. Ямінск), “Глыбокія крыніцы” (в. Закальное), “Павалякі“ (в. Обчын). У Любанскім раёне дзейнічае яшчэ 3 аўтэнтычныя гурты: "Шчодрык" (в. Рачэнь), "Кацярынка" (в. Дарасіно), "Хамейліха" (в. Кузмічы). "Кацярынку" і "Шчодрык" можна было пачуць на фэсце. Разам з аўтэнтычнымі гуртамі ў праграму арганічна ўпісаліся калектыў "Беражніца" (в. Пласток), дзіцячы гурт "Емельянаўна" (в. Закальное), а таксама сямейны гурт Ціханоўскіх "Карані". “Глыбокія крыніцы” як гаспадыні распачалі і завяршылі фэст у Закальным. Гурт у апошнія гады пашырыў свой склад за кошт маладзейшых жанчын. Некаторыя з іх – дочкі старэйшых спявачак, мабыць, таму і гучаць “Глыбокія крыніцы” неяк цёпла, па-сямейнаму. Дзяўчаты з гурта "Емельянаўна" толькі вучацца спяваць. Для назвы калектыва абралі імя па бацьку першай кіраўніцы народнага хора ў Закальным. З гуртом "Журавушка" спявае іх мастацкі кіраўнік Алена Анатольеўна Хадароўская. Гучанне вельмі ажыўляецца ад яе сакавітай падводкі. Зусім нядаўна пайшла на той свет адна з асноўных спявачак "Павалякаў", Зоня Нічыпараўна Галай. Яна запявала, высока падводзіла. На фэсце "Бабулі" гурт упершыню выступаў без Зоні Нічыпараўны. Таму давялося вучыцца падводзіць Вользе Іванаўне Дастанка. У 82 гады – дэбют! Вычыцца спяваць разам з бабулямі мастацкі кіраўнік Наталля Аляксандраўна Акуліч. У Пластоцкім сельскім доме культуры працуе Соф'я Міхайлаўна Каток. Мабыць, дзякуючы яе энергіі і паўстаў гурт "Беражніца". У вёсцы яшчэ засталіся носьбіты традыцый, але выступаць праз узрост і стан здароўя яны ўжо не могуць. Затое яшчэ ёсць магчымасць пераняць ад іх песні і танцы. Жанчыны з "Беражніцы" ўзгадваюць і песні, пачутыя калісці ад сваіх матуль. Гурт "Карані" прыехаў не ў поўным складзе. Выступалі Уладзімір Аляксандравіч Ціханоўскі з жонкай і дочкамі. Звычайна ж далучаюцца яшчэ зяць Уладзіміра Аляксандравіча і ўнукі. Нягледзячы на гэта гурт "завёў" залу, гледачы не жадалі адпускаць Ціханоўскіх, прасілі спяваць яшчэ і яшчэ. У рэпертуары сям'і – песні з Любаншчыны, а таксама з в. Дубейкава Мсціслаўскага раёна, радзімы заснавальніка і натхняльніка гурта Уладзіміра Ціханоўскага. У складзе "Кацярынкі" з в. Дарасіно выступіла 5 спявачак старэйшага ўзросту, больш, чым у любым іншым гурце на фэсце. Дарасіно здаўна славіцца сваёй керамікай, і памяць пра гэта жыве нават на побытавым узроўні. Вітаючыся з дарасінцамі, некаторыя пыталіся іх: "Ну, як вы там са сваімі гаршкамі?" У складзе гурта "Шчодрык" з в. Рачэнь прыехала 2 старэйшыя спявачкі і 3 жанчыны-пераймальніцы сярэдніх гадоў. На іх выступ зала зрэагавала вельмі жыва. Калі бабулі спявалі "Кавалю-кавалю, чаму ты не куеш? Ці ў цябе, кавалю, сталі не хватае Ці ў цябе, казачэ, дзеўчыны не мае?", нехта з гледачоў з разуменнем паміхнуўся: "Ды скаваў ужо..." І праўда, далей па тэксце: "Ёсць у міне дзеўка, дзеўка Кацярына, Тая Кацярына стыду нарабіла, У нядзелю рана сыночка радзіла" Увогуле назіраць за публікай, слухаць перашэптванні на сельскіх канцэртах, калі адны носьбіты традыцый слухаюць іншых – адно задавальненне. Вось вядоўца, загадчык арганізацыйна-творчага аддзела Любанскага дома культуры Сяргей Георгіевіч Выскварка распавядае са сцэны, што ў адной са спявачак 9 дзён таму нарадзілася праўнучка. Зала рэагуе адразу: "Хай расце здарова!". Такая вось кранальная камунікацыя. Не менш эмацыйна насычана канцэрт завяршаецца: Сяргей Георгіевіч прапануе мастацкаму кіраўніку кожнага гурта са сцэны ўзгадаць усіх удзельнікаў, якія ўжо пакінулі гэты свет, запаліць свечку. Такія моманты вельмі яднаюць, сціраецца мяжа паміж сцэнай і залай, гледачы становяцца ўдзельнікамі. Наведвальнікі канцэрта маглі паглядзець этнаграфічны куток у клубе в. Закальное. Можна сказаць, што практыкі аховы нематэрыяльнай культурнай спадчыны Любанскага раёна могуць разглядацца як узорныя для ўсёй Беларусі. Адна з яскравых адметнасцяў – тут бабулі вучаць спяваць маладзейшага за іх мастацкага кіраўніка гурта, а не наадварот. Алена Ляшкевіч. Фотасправаздача: Фэст аўтэнтычных спеваў "Бабулі" ў в. Закальное Любанскага раёна Форум для отзывов 11 не существует. |
|