Дакументальны фільм “Дачка Прыпяці” атрымаў прыз на II міжнародным інтэрнэт кінафестывалі “Independent Star”

Паўнаметражны дакументальны фільм “Дачка Прыпяці” вытворчасці “Беларускага відэацэнтра” 2012 года атрымаў прыз у намінацыі “Дакументальны фільм” на II Міжнародным інтэрнэт кінафестывалі “Independent Star” (Украіна - Іспанія). Рэжысёр Ігар Бышнёў. Сцэнарый Ігара Бышнёва і Юрыя Ігрушы. Прадзюсер Юрый Ігруша. Кансультант Рэгіна Гамзовіч.

Фільм прысвечаны жыхарам вёскі Пагост Жыткавіцкага раёна Гомельскай вобласці, якія жывуць у міжрэччы Прыпяці і Сцвігі непадалёк ад Турава. Назва вёскі азначае месца збору князем палюддзя. І хоць першае ўпамінанне адносіцца да 1520 года, жывыя традыцыі і археалагічныя знаходкі сведчаць пра яе вельмі даўняе паходжанне. Народныя традыцыі захоўвае гурт “Міжрэчча”, створаны ў 1980 годзе Кацярынай Панчэня, бацька якой быў знакамітым гарманістам, таму іх сям’я была цэнтрам культурнага жыцця Пагоста. Дзяўчынка, адораная музычным слыхам і голасам, была такой жа працавітай, як яе бацькі, сваякі і суседзі, з дзяцінства ўпітвала той самабытны дух і навыкі, якімі валодалі лепшыя таленавітыя жыхары Прыпяцкага Палесся. Яна і стала галоўнай гераіняй фільма, які расказвае пра яе нялёгкі жыццёвы лёс і творчасць, сябровак, якія разам з ёю захавалі архаічныя абрады, песні, танцы і карагоды, жаночыя рамёствы, характэрныя для этнарэгіёна Тураўшчына Усходняга Палесся.

Усё іх жыццё звязана з Прыпяццю і гэтым куточкам багатай урадлівай зямлі, якія кормяць і пояць, натхняюць сваёй прыгажосцю, але і вымушаюць часам на суровыя выпрабаванні. Кацярына Панчэня па-хрысціянску ўсё цярпліва і мужна перадольвае, успамінаючы лёс сваіх бацькоў і продкаў, якія ціха спачылі ў Дзедавай даліне на беразе Прыпяці. Такія ж і іншыя гераіні фільма: вось тураўскія мадонны з немаўлятамі на руках, прымаюць хрост і прычасце ў старажытнай тураўскай царкве Усіх святых, 90-гадовая спявачка з вёскі Чэрнічы па мянушцы Прэдкава з яе старажытнай манерай выканання песень, пагосцкія жанчыны ў працы, штодзённых клопатах і святочных абрадавых дзеях — як увасабленне вернасці традыцыям продкаў, веры і надзеі на лепшае жыццё.

Фільм “Дачка Прыпяці” ужо неаднаразова станавіўся прызёрам розных фестываляў у Беларусі і Расіі:

2014 год – ГРАН-ПРЫ 10-га Міжнароднага фестывалю хрысціянскіх фільмаў «Магніфікат», Беларусь;

2013 год – ПРЫЗ за «Лепшую аператарскую працу» Міжнароднага кінафорума «Залаты Віцязь» г. Масква, Расія;

ГАЛОЎНЫ ПРЫЗ намінацыі «Лепшая рэжысёрскі праца» Міжнароднага экалагічнага фестывалю "СПАСТИ И СОХРАНИТЬ", г. Ханты-Мансійск, Расія.

Гэтым жа творчым калектывам зняты яшчэ адзін шырокавядомы фільм “Кола часу”, у якім паказаны каляндарны год з жыцця вёскі Пагост у абрадах, песнях, рамёствах, промыслах. Знакаміты Абрад Юр’я вёскі Пагост Жыткавіцкага раёна, уключаны ў Дзяржаўны спіс гісторыка-культурных каштоўнасцей Рэспублікі Беларусь.

Рэгіна Гамзовіч

Зварот да спісу

Форум для отзывов 1 не существует.